Kaliforníudraumar

Við erum mætt til Kaliforníu, íslenska sendinefndin! Undirritaður og Auður mættum hér í Anaheim, Kaliforníu um kl. 14 í dag. Það var auðvitað komið kvöld hjá ykkur á Íslandi, kl. 21, því tímamunurinn er 7 tímar. Við erum hér á ráðstefnu sem kallast Alternatives 2010. Mér skilst að þetta sé í 26. skipti sem þessi ráðstefna er haldinn svo þau hafa verið lengi að.

En ráðstefnan fjallar um hvernig má fást við geðraskanir út frá sjónarhóli þeirra sem glíma við þær.

Hér eru um 1200 manns.

Ég veit ekki hvað ég endist við skriftir í kvöld og myndir bíða betri tíma.

Ég vildi setja nokkrar línur niður á blað, svona til að láta vita af okkur. Ráðstefnan er svosem ekki byrjuð. Það var þó kynning á ráðstefnunni fyrir þá sem eru að sækja hann í fyrsta sinn. Svo var líka auðvitað setningarkvöldverður.

En, úff, svo byrjar líka þvílík dagskrá. Dagarnir eru þannig uppbyggðir að eldsnemma á morgnana er boðið uppá leikfimi, jóga og fleira gott fyrir þá sem vilja, morgunverður og svo byrjar fyrirlestrar og vinnuhópar.

Það eru þrjár tarnir yfir daginn, og endað með sameiginlegri sessjón í lok dags. Til að gefa ykkur dæmi þá er fyrsta törnin milli 10 og 11:30 á morgun og þá er hægt að fara á 17 mismunandi staði þar sem fjallað er um aðskiljanlegustu efni. Svona heldur þetta áfram sleitulaust framá sunnudag. Mikið af þessu er mjög áhugavert og við náum augljóslega ekki að fara á allt sem við höfum áhuga á. En það verður hægt að fá upptökur af öllum fyrirlestrum og vinnustofum strax að þeim loknum.

Aftur að setningarkvöldverðinum. Þar sem var (eins og gefur að skilja) borðað. Svo töluðu skipuleggjendur ráðstefnunnar, þ.á.m. vinur okkar Daniel Fisher og öldungardeildarþingmaðurinn Lou Correa. Mestur tíminn fór svo í fyrirspurnir til Pamelu Hyde sem fer með forstöðu fyrir SAMSHA (Substance Abuse and Mental Health Services Administration) sem er deild innan bandaríska heilbrigðisráðuneytisins sem fer með misnotkun á vímuefnum og geðraskanir. SAMSHA er aðalstuðningsaðili ráðstefnunnar.

Það voru langar raðir af fyrirspyrjendum og ég yfirgaf staðinn þegar orðið var býsna þunnskipað við borðin. Ég ætla ekki að þreyta ykkur með því sem var spurt um. Margt af þessu þekkjum við frá Íslandi. Svo var auðvitað ánægjulegt að sjá hvernig að við erum lengra komin á nokkrum sviðum.

Fróðlegast fannst mér að sjá að mörg þau vandamál sem við erum að glíma við heima eru þau sömu og verið er að glíma við hér.

En það sem stendur uppúr deginum var að hitta mikið af fólki. Margir eru forvitnir um stöðu mála á Íslandi og margir hafa boðist til að sýna okkur ýmsa starfsemi sem fer fram hér í nágrenninu, því við höfum verið að finna einhver skjólhús (respite/safe-house) sem við gætum heimsótt. Við erum auðvitað í einstakri aðstöðu hér innanum um alla helstu leiðtoga þessarar hreyfingar í Bandaríkjunum.

Við höfðum af því spurnir að Daniel Fisher hefði tekið miklu ástfóstri við peysuna góðu og hafa samstarfsmenn hans og -konur litið hana öfundaraugum. Hann var líka mjög hrifinn af Sjálfstæðu fólki.

Þetta hefur verið þurr upptalning á nokkru því sem fyrir augu hefur borið, en nær engan veginn að lýsa andanum á staðnum. Ég hef vægast sagt verið upptendraður.

Ég ætla að láta þetta nægja í bili.

Hlýjustu kveðjur,

Hrannar 

Athugasemdir

[Bergur Ísleifsson (IP-tala skráð) 30.9.2010 kl. 06:44]

Þakka þér fyrir þennan skemmtilega pistil Hrannar, ég mun vekja athygli á honum á fundinum í dag, fimmtudag og fá sem flesta til að kíkja við og vonandi æfa sig í að svara og vera með.

Já, þetta er hörkuvinna að sitja svona ráðstefnu og ætla að reyna að fylgjast með öllu. Ég vona samt að þú eða Auður gefið ykkur tíma til að henda hér inn fleiri bloggfærslum um það helsta sem á dagana drífur, svona forrétt á það sem koma skal þegar heim verður komið.

Gangi ykkur vel.

[Herdis (IP-tala skráð) 30.9.2010 kl. 11:17]

Elsku Auður og Hrannar.

Við sendum ykkur ameriskar kveðjur og vitum að þið standið ykkur eins og flottustu sendiherrar.  Af okkur er frekar tíðaindalítið en samt gott að frétta.

Maggi átti varla orð yfir þeim hlýhug sem hann fékk frá okkur.  Hann treystir sér ekki enn að fara í íbúðina og býr á verkstæðinu sem hann vinnur hjá.  En hann er farinn að brosa og það er fyrir öllu.

Annars allt í góðu, kær kveðja Herdís.

[Eymundur Eldhugi (IP-tala skráð) 30.9.2010 kl. 11:19]

Frábært að geta fylgst með ykkur á blogginu og gott að þið hafið ratað á réttan stað:) Og gangi ykkur vel að vakna:) Kær kv.Eymundur Eldhugi

[Kristján Steinarsson (IP-tala skráð) 30.9.2010 kl. 12:41]

Hrannar, ég á varla orð hvað þér tekst að segja skemmtilega og spennandi frá, ég las hvert orð þurfandi að því næsta og táraðist í lok færslu hversu góða hluti við erum að gera með Daniel Fisher og lopapeysuna góðu. Endilega segðu okkur frá sem oftast og skilaðu kveðju til Auðar og segðu henni ég sé í lagi

[Ari Jósepsson, 30.9.2010 kl. 14:34]

Þetta er frábært að geta filst með ykkur hér og hlakka að sjá video þegar þið komið heim.

Enn góðar kveðjur frá Íslandi.

Kv Ari

[Adda (IP-tala skráð) 1.10.2010 kl. 00:27]

Frábært að lesa hvað gengur vel í Ammeríkunni! Þið eruð verðugir fulltrúar okkar. Gaman að lesa að Daniel Fisher líkar peysan

Það verður fróðlegt og skemmtilegt að fylgjast með ykkur.....

Kveðja, Adda

[Valgeir Matthías Pálsson (IP-tala skráð) 1.10.2010 kl. 08:55]

Glæsilegt. Gaman að heyra frá ykkur. Gangi ykkur vel vinir.