Góðir víbrar

Good good good good vibrations
(Oom bop bop)
(I'm pickin' up good vibrations)

Beach Boys: Good Vibrations

Í dag hafa verið kröftugir víbrar. Meira að segja þrumur í morgun.

Robert Whitaker heitir blaðamaður og rithöfundur sem hefur skrifað aðgengilegt efni um meðferð við geðröskunum í Bandaríkjunum "Mad in America" sem kom út árið 2002. Hann fjallar svo um ofnotkun á lyfjum og hæpnar vísindalegar forsendur fyrir þessari ofnotkun í bókinni "Anatomy of an Epidemic" sem kom út á þessu ári. Hann fékk hlýjar viðtökur, það sem heitir á ensku "standing ovation". Ef einhver hefur poppstjörnustatus í hreyfingunni okkar er það hann og á hans tölu byrjaði dagurinn.

Strax eftir fyrirspurnir fór Whitaker yfir í sýningarsalinn að árita bókina. Ég, kænn sem ég er, stökk auðvitað af stað rétt áður en fyrirspurnunum lauk og náði að vera framarlega í röðinni. Ég nældi í tvö eintök af hvorri bók, annað fyrir mig, hitt fyrir bókasafnið okkar og fékk þau árituð. Okkar áritun er: "To Hugarafl, Here's to change and mindfreedom!".

Kl. 10 sáum við fyrirlestur með Kevin Hines sem er einn af 32 sem hefur lifað það af að stökkva af Golden Gate brúnni í San Francisco. Hann hefur eftir það verið með fyrirlestra um sjálfsvígforvarnir. Ekki ólíkt því sem við gerum með geðraskanir og geðfræðsluna. Írsk hljómsveit, Friends of Emmet, gerði lag og video sem sótti innblástur í Kevin, það heitir Coming Apart, Kevin sést í upphafi og lok myndbandsins. Annars er bloggið hans hér.

Í hádegismatnum var annar fyrirlestur. Í þetta sinn talaði Mark Ragins geðlæknir sem kemur meðal annars fyrir í bíómyndinni "The Soloist". Hann er líka mikill talsmaður batamódelsins. Hann var með marga góða punkta. Við Auður munum verða okkur úti um báða þessa fyrirlestra svo þið munið geta séð þá líka.

Við Auður tókum ekki annað í mál en vera á vinnustofu um eCPR. Þetta sem Fisher talaði um þegar hann var hér. Með eCPR er verið að leika sér með skammstöfunina CPR sem á ensku stendur fyrir lífgunartilraunir. e stendur þá fyrir tilfinningar, semsagt tilfinningalífgunartilraunir sem hljómar auðvitað ekkert sérlega þjált á íslensku. En semsagt verið er að vísa til þess að rétt eins og stundum er þörf á lífgunartilraunum þarf að bregðast við í tilfinningalegum krísum. Daniel Fisher, Lauren Spiro, Will Hall og Tracy Love stýrðu þessari vinnustofu. Við gerðum í þessu ýmsar æfingar. Ykkur að segja held ég að Auður okkar sé ninja með svarta beltið í þessu og held að gæti kennt margt um þetta. Sem minnir mig á annað, margt erum við að gera vel á Íslandi og getum kennt öðrum.

Við sátum árlegan fund NCMHR (National Coalition for Mental Health Recovery eða Landssamtök fyrir bata af geðröskunum sem eru regnhlífasamtök félaga líku Hugarafli í Bandaríkjunum) þar sem var verið að leggja línurnar fyrir áhersluatriði í baráttu þeirra næsta árið. Þau notuðu mjög frumlega aðferð til að fá fram sjónarmið sem flestra og þrengja þau niður í nokkur aðalatriði. Ég ætla ekki að lýsa henni hér en þetta er eitthvað sem við getum örugglega notað í framtíðinni.

Ég kom svo við á "Opnum hljóðnema", kvöld sem er árlegur viðburður. Þar getur hver sem er skráð sig og sungið, farið með ljóð, uppistand eða hvað sem er. Ég tók smá videosýnishorn.

Ég rambaði uppá aðra hæð til að sjá hvort eitthvað væri í gangi þar og kom að litlum hóp sem var á spjalli með Robert Whitaker. Ég var búinn að gleyma að ég hafði ætlað að kíkja á þessa vinnustofu, þar sem átti að ræða um nýjar áherslur í geðheilbrigðiskerfinu. Ég veit ekki hvað þau höfðu rætt áður en ég kom, en það sem ég tók þátt í var meira um viðbrögðin við bókinni og atburðarásina sem fór í gang þegar hann átti ekki að fá að tala á ráðstefnunni, vægast sagt furðulegan ritdóm í Boston Globe en ég ætla ekki að þreyta ykkur með því öllu núna. Þarna hefði ég viljað hafa Steindór með ég veit að báðir hefðu haft gaman af.

Áður en ég kom uppí herbergi kíkti ég svo aftur á "open mic" sem var í fullum gangi. Ótrúleg sköpunargleði, söngvar, ljóð og ýmis konar tjáning.

Takk fyrir allar hlýju kveðjurnar á kommentunum við færslurnar, þær gefa mér kraft til að geta skrifað þær áður en ég fer að sofa. Þetta eru auðvitað bara tæpt á því helsta, en þetta eru í og með minnispunktar sem við getum fjallað um. Það er svo margt sem ég skrifa ekki um, um "pólitíkina", undirölduna og deigluna sem er í gangi. Það eru líka mikil forréttindi að fá að vera hérna og í svona miklu návígi við fólk sem hefur í áraraðir verið í baráttunni.

Ég vildi óska að við værum fleiri hérna, ég finn svo sterkt fyrir að við erum hluti af alþjóðlegri hreyfingu og ég veit líka að við höfum ýmislegt til málanna að leggja. Maður getur látið sig dreyma um að á næsta ári... Sem minnir mig á það að Auður minnti Daniel Fisher á að hann talaði um að koma aftur í heimsókn í maí á næsta ári. Það er ekki annað á honum að heyra en hann ætli að koma.

Athugasemdir

[Bergur Ísleifsson (IP-tala skráð) 2.10.2010 kl. 12:04]

Takk fyrir þetta. Það er bæði gaman og hressandi að lesa svona um hvað á daga ykkar drífur þarna úti og ég hlakka til að sjá myndirnar svo maður geti nú sett þetta allt í alvöru samhengi.

Blessaður haltu áfram blogginu - hvenær komið þið Auður heim annars?

Sit hér við tölvuna í Hugarafli, en á eftir ætlum við að horfa hér á heimildarmyndina um Hallgrím. Vonandi verður fjölmennt.

[Ari Jósepsson, 3.10.2010 kl. 00:13]

Það er bara mikið að gerast hjá ykkur og þið standið ykkur rosalega vel :)

Kv Ari

[Eymundur (IP-tala skráð) 3.10.2010 kl. 11:34]

Gaman að fylgjast með og hvað er mikið að gerast Og myndin um Hallgrím og Hugarafl er stórkostleg og á eftir vekja menn af værum blundi! Kær kv. Eymundur Eldhugi

[Fríða (IP-tala skráð) 3.10.2010 kl. 22:42]

Gaman og gott að heyra af ykkur. Alltaf gott að heyra að verið sé að vinna í geðheilbrigðismálum  koma með nýjar áherslur og skerpa á þeim eldri. Frábært að geta fylgst með hér á blogginu.

Kv. Fríða

[marteinn (IP-tala skráð) 4.10.2010 kl. 11:55]

ég hef mikinn ahuga um meiri umræðu um geðhvörf 1 mér hefur fundist að umræðan hefur verið miklu meiri um geðklofa þó það sé gott útaf fyrir sig.

[Þórey (IP-tala skráð) 4.10.2010 kl. 18:12]

Hæ Hrannar!

Já, mikið vildi ég fá að upplifa það að fara á svona viðburð. Held að það sé afar mikilvægt fyrir okkur að fá innspýtingu utan frá og áminningu um allt það góða starf sem fer fram hér heima. Þið hreinlega verðið að segja okkur frá því sem þið upplifðuð þegar þið komið heim og því sem er í gangi annars staðar.

Endilega haltu áfram að blogga. Ég hugsa til ykkar

kv Þórey